8 снежня 2022 года студэнты 2 курса спецыяльнасці «Пачатковая адукацыя» дзённай формы навучання сумесна са старшым выкладчыкам кафедры прыродазнаўчых і лінгвістычных дысцыплін і методык іх выкладання Святланай Дзмітрыеўнай Грынько прысутнічалі на прэзентацыі кнігі Анатоля Тарасавіча Федарука «Старадаўнія сядзібы Гродзеншчыны», якая была арганізавана выдавецкім домам «Звязда» ў Гродзенскім дзяржаўным гісторыка-археалагічным музеі (памяшканне «Новага замка»).
У прадстаўленым выданні апісана гісторыя ўзнікнення і развіцця, а таксама сучасны стан сядзіб Свіслачыны і Слонімшчыны.
Пра плённую і крапатлівую працу Федарука і яго ўнікальнае даследаванне распавяла навуковы рэдактар, кандыдат гістарычных навук Вольга Мікалаеўна Папко, да якой далучыліся і іншыя выступоўцы, прадстаўнікі дзяржаўных структур і ўстаноў адукацыі. Дадзеная прэзентацыя яшчэ раз дала магчымасць ацаніць важнасць культурна-асветніцкай дзейнасці музея для папулярызацыі нацыянальнай спадчыны Рэспублікі Беларусь.
