На педагагічным факультэце адбылася вечарына “Чалавек, які трымаў ключы ад Беларусі: жыццё і ўзнясенне Уладзіміра Караткевіча” (да 85-годдзя з дня нараджэння пісьменніка), арганізаваная дацэнтамі кафедры прыродазнаўчых і лінгвістычных дысцыплін і методык іх выкладання Г.У.Крофта і А.М.Лапкоўскай, а таксама супрацоўнікамі навуковай бібліятэкі ўніверсітэта.
Чыталіся вершы У.Караткевіча, гучалі песні ў выкананні студэнтаў педагагічнага факультэта і факультэта мастацтваў. Супрацоўнікі бібліятэкі ГрДУ імя Я.Купалы пазнаёмілі гасцей вечара са скарбамі, якія захоўваюцца ў кніжных фондах: кнігамі з аўтографамі пісьменніка, рэдкімі выданнямі.
Сапраўднай “разынкай” стала сцэнічная пастаноўка казкі “Чортаў скарб”, выкананая тэатральным гуртком педагагічнага факультэта “Летуценнік”.
Напрыканцы вечара кожны атрымаў раздрукоўку з партрэтам і вершам У. Караткевіча.
