У халодны красавіцкі вечар для ўсіх, хто жадаў сагрэцца цеплынёй беларускага слова, адчыніла дзверы «Беларуская гасцёўня», якая прайшла ў межах светкавання дзён навукі і творчасці кафедры лінгвістычных дысцыплін. Падрыхтавалі свята выкладчыкі кафедры З.М.Тамашэвіч, А.К.Гачко, Г.У.Крофта.
Вечар пачаўся з «Музычнай гасцёўні», дзе прагучалі песні ў выкананні студэнткі педагагічнага факультэта Карыны Млыноўскай і гасцей з факультэта мастацтваў і дызайну Доктарава Андрэя, Панісава Андрэя, Шаршуновіча Эдуарда. Прысутныя былі ўражаны песняй «Келля-зорка», якая прымусіла кожнага прыслухоўвацца, стаіўшы дыханне, да цудоўных слоў, пакладзеных на музыку.
У «Паэтычнай гасцёўні» адбылася сустрэча з паэтамі Алай Петрушкевіч і Анатолем Брусевічам, якія падзяліліся развагамі пра сутнасць паэтычнай творчасці і прачыталі свае творы. Прагучалі таксама вершы студэнткі 1 курса Далабей Вольгі.
У гасцёўні «Залацінкі роднай мовы» прапаноўваліся лінгвістычныя гульні. Студэнты і вучні СШ №32, запрошаныя на вечарыну, прадэманстравалі высокі ўзровень валодання роднай мовай.
Апошняй чакала гасцей «Танцавальная гасцёўня», у якой прыняў удзел танцавальны калектыў СШ №32 “Фантазёры”.
Напрыканцы вечара вядучая Кацярына Курчэня пажадала ўсім прысутным часцей гасцяваць і прымаць гасцей, дзяліцца з блізкімі цеплынёй і ласкай. Завяршыўся вечар песняй-малітвай за родны край «Я к табе, Беларусь» у выкананні Карыны Млыноўскай.
