Калядная вечарына “Ой, калядачкі! Бліны-ладачкі!” на педагагічным факультэце
13 студзеня 2014 года кафедра лінгвістычных дысцыплін і методык іх выкладання распачала светкаванне Дзён навукі і творчасці каляднай вечарынай “Ой, калядачкі! Бліны-ладачкі!” На вечарыну былі запрошаны і вучні выпускных класаў СШ №32 г.Гродна, і замежныя студэнты, якія жывуць у інтэрнаце №4 па вул. Пралетарская, 16.
На калядках прысутнічалі: декан педагагічнага факультэта В.П.Таранцей, намеснік декана Н.С.Міхайлава, метадыст аддзела маладзёжнай палітыкі УВРЗМ універсітэта, старшыня ПСА "Белая Русь" С.А.Іваноў, загадчык кафедры І.М.Кавінкіна, выхавальнікі інтэрната В.С.Грыбок, Н.Б.Швяцова, педагог-псіхолаг М.К.Акуліч, выкладчыкі, супрацоўнікі бібліятэкі і студэнты факультэта.
Удзельнікі вечарыны запрасілі ўсіх у дзівосны свет народных абрадаў, у свет спадчыны беларускага народа.
Вечар запомніўся цеплатой душэўнага прыёму студэнтаў, якія разам з А.М.Лапкоўскай і З.М.Тамашэвіч, дацэнтамі кафедры лінгвістычных дысцыплін і методык іх выкладання, падрыхтавалі цікавую праграму. Цудоўнае музычнае суправаджэнне вечарыне і бадзёры настрой дапамог забяспечыць студэнт 2 курса факультэта мастацтваў і дызайну Максім Казуленка.
Стол "ламіўся" ад смачных пачастункаў: аладкі, пончыкі з макам, піражкі з капустай, агуркі самасоленыя, вяндліна, каўбаска, сала, грыбочкі, перчыкі і інш.
Калядоўшчыкі спявалі народныя песні, частушкі, танцавалі, а госці адгадвалі загадкі і прыказкі, за што атрымлівалі арэхі.
Частушкі спявалі не толькі і калядоўшчыкі, але і госці вечарыны. Не змаўкалі апладысменты, калі спявалі Віктар Пятровіч Таранцей, Сяргей Алегавіч Іваноў, Вераніка Станіславаўна Грыбок, Алена Канстанцінаўна Гачко і інш.
Дзяўчаты ж варажылі на сваё замужжа: хто першым замуж пойдзе, кім па прафесіі будзе будучы абраннік. Таксама папыталі шчасця ў сабакі і пеўня, якія павінны былі вырашыць: хто ж з дзяўчыт першы замуж пойдзе? А пры дапамозе шарыка са сняжынкамі дзяўчаты даведаліся, у якім месяцы і годзе ім чакаць да хаты сватоў.
У сваю ж чаргу студэнты падзяліліся з калядоўшчыкамі сваімі спосабамі варажбы.
Вечар закончыўся сумеснай песняй “Жывіце багата!”.
