21 лютага 2019 года студэнты педагагічнага факультэта і факультэта фізічнай культуры напісалі «Купалаўскую дыктоўку», якая прайшла ва ўніверсітэце з нагоды Міжнароднага Дня роднай мовы і прысвечана да 79-годдзя ўніверсітэта.
Дыктоўка распачалася з відэазвароту рэктара Гродзенскага дзяржаўнага ўніверсітэта імя Янкі Купалы Ірыны Фёдараўны Кітурка, якая павіншавала ўсіх са святам, прапанавала «закласці новую традыцыю і напісаць дыктоўку на нашай роднай, мілагучнай, старажытнай, гасціннай, патрыятычнай, незалежнай беларускай мове».
Затым перад прысутнымі выступіла дэкан педагагічнага факультэта Святлана Якаўлеўна Кострыца. Яна таксама павіншавала ўсіх з Міжнародным Днём роднай мовы і пажадала поспехаў.
Жанна Сямёнаўна Сіплівеня, дацэнт кафедры беларускай філалогіі, кандыдат філалагічных навук, дацэнт, расказала, што тэкст дыктоўкі прысвечаны ў першую чаргу Янку Купалу, імя якога носіць наш універсітэт, Міжнароднаму Дню роднай мовы, а таксама Году малой радзімы. Затым пазнаёміла ўдзельнікаў з тэкстам дыктоўкі і запрасіла акунуцца ў чароўны свет беларускай мовы.
Трэба адзначыць, што жаданне напісаць дыктоўку выказалі не толькі беларускія, але і замежныя студэнты. Так, студэнтка 4 курса спецыяльнасці «Пачатковая адукацыя» Абдырэйманава Зіяда, якая ўжо хутка будзе здаваць дзяржаўныя экзамены і вернецца ў свой любімы Туркменістан, адзначыла, што для яе гонар прыняць удзел у такім мерапрыемстве.
Напрыканцы дыктоўкі многія студэнты былі задаволеныя сваімі вынікамі.
https://vk.com/album-43970737_259872455
