20 лютага 2019 года на педагагічным факультэце адбылася сустрэча выкладчыкаў і студэнтаў з Алесем Аляксандравічам Сушам, намеснікам дырэктара па навуковай рабоце і выдавецкай дзейнасці Нацыянальнай бібліятэкі Беларусі, кандыдатам культуралогіі. Сустрэча была арганізавана дырэктарам і супрцоўнікамі навуковай бібліятэкі ўніверсітэта.
Пачаў сустрэчу Мікалай Уладзіміравіч Грынько, які адзначыў, што мерапрыемства праводзіцца ў межах тыдня беларускай мовы, які адзначаецца ў купалаўскім вузе.
Затым Алесь Аляксандравіч правёў прэзентацыю факсімільнага выдання першага беларускага «Буквара». У сваім выступленні навуковец адзначыў, што менавіта беларусы прыдумалі слова «буквар». Першая ў свеце кніга пад такою назваю выдадзена 24 ліпеня 1618 года ў тыпаграфіі Віленскага Свята-Духава праваслаўнага братэрства. Кніга прызначалася для пачатковай адукацыі ў розных краінах свету. Ёсць усяго два экзэмпляры «Буквара» 1618 года: адзін з іх знаходзіцца ў Капенгагене, а другі ў Лондане. Яго поўная назва – «Букварь языка славенска, писаний чтения оучитися хотящим в полезное руковождение». Першы ў свеце «Буквар» – беларускі. Ён сапраўды наш нацыянальны брэнд, – рэзюміраваў даследчык.
На мерапрыемстве выступіла дацэнт кафедры прыродазнаўчых і лінгвістычных дысцыплін і методык іх выкладання, кандыдат філалагічных навук, дацэнт Зоя Міхайлаўна Тамашэвіч. Яна коратка прааналізавала структуру буквара, яго змяненні і ўдасканаленні ў адпаведнасці з патрабаваннямі часу.
Падчас мерапрыемства дэманстравалася выстава беларускіх буквароў, якую арганізавалі загадчык філіяла навуковай бібліятэкі Святлана Іосіфаўна Дзеціна і супрацоўнік філіяла Пятрашка Наталля Тадэвушаўна.
Студэнты і выкладчыкі педагагічнага і філалагічнага факультэтаў задавалі пытанні і былі вельмі зацікаўленыя падчас мерапрыемства.
Дырэктар науковай бібліятэкі Мікалай Уладзіміравіч Грынько і намеснік дэкана па ідэалагічнай і выхаваўчай рабоце педагагічнага факультэта Алена Мікалаеўна Лапкоўская падзякавалі за цікавую і пазнавальную гутарку, выказалі надзеі на далейшае супрацоўніцтва.
Закончылася сустрэча музычным падарункам ад студэнткі 1 курса педагагічнага факультэта Іны Траян.
https://vk.com/album-43970737_259872036
