31 сакавіка 2015 года ў Гродзенскай абласной навуковай бібліятэцы імя Я.Ф.Карскага адбылася літаратурная вечарына, прысвечаная 90-годдзю з дня нараджэння Віктара Шведа – паэта, перакладчыка, публіцыста, заслужанага дзеяча культуры Польшчы.
Cтудэнты педагагічнага факультэта разам з А.М.Лапкоўскай, намеснікам дэкана па ідэалагічнай і выхаваўчай рабоце, дацэнтам кафедры лінгвістычных дысцыплін і методык іх выкладання, і М.І.Лойка, выкладчікам кафедры лінгвістычных дысцыплін і методык іх выкладання, прынялі ўдзел у вечарыне.
Віктар Мікітавіч Швед – аўтар вялікай колькасці кніг паэзіі і перакладаў твораў для дарослых і дзяцей. Ён з’яўляецца адным з пачынальнікаў і актыўным удзельнікам Беларускага літаратурна-мастацкага аб’яднання «Белавежа» ў Польшчы, сябрам Саюза польскіх літаратараў.
На творчай вечарыне выступілі: консул Генеральнага консульства Рэспублікі Беларусь ў Беластоку Мікалай Сцяпанавіч Камышык, які адзначыў, што Віктар Мікітавіч уносіць вялікі ўклад ва ўмацаванне літаратурных сувязей Польшчы і Беларусі; начальнік упраўлення мастацтва, культурна-асветных устаноў народнай творчасці і навучальных устаноў галоўнага ўпраўлення ідэалагічнай работы, культуры і па справах моладзі Гродзенскага аблвыканкама Алена Віктараўна Клімовіч; дырэктар ДУК «Гродзенская абласная навуковая бібліятэка імя Я.Ф.Карскага» Лідзія Васільеўна Мальцава; старшыня Гродзенскага гарадскога аддзялення саюза палякаў на Беларусі Казімір Казіміравіч Знайдзінскі і іншыя.
Супрацоўнікамі аддзела абанемента бібліятэкі была падрыхтавана выстава, на якой былі прадстаўлены паэтычныя зборнікі В.Шведа на беларускай і польскіх мовах, а таксама выданні Беларускага літаратурнага аб’яднання «Белавежа», дзе па сённяшні дзень друкуюцца творы юбіляра.
Падчас правядзення сустрэчы прысутным дэманстравалася мультымедыйная прэзентацыя, прысвечаная жыццю і творчасці Віктара Мікітавіча.
А.М.Лапкоўская
