Студэнты педагагічнага факультэта паглядзелі п’есу “Паляванне на зубра”
19 лютага студэнты 1 курса спецыяльнасці “Пачатковая адукацыя” разам з выкладчыкамі педагагічнага факультэта наведалі Гродзенскі тэатр лялек і сталі гледачамі п’есы “Паляванне на зубра”.
Напоўненая складаным сімвалізмам, па-майстэрску ўвасобленая на сцэне, п’еса ўсхвалявала, уразіла, прымусіла задумацца над гістарычным лёсам нашай краіны, экалагічнымі праблемамі і – самае галоўнае – дапамагла глыбей зазірнуць у душу беларускага народа. За аснову пастаноўкі была ўзята класічная паэма “Песня пра зубра” Міколы Гусоўскага, пададзеная ў сучасным прачытанні, насычаная алюзіямі на гістарычныя падзеі розных часоў. Эмацыйны накал п’есы нікога не пакінуў абыякавым.
“П’еса зачароўвае і інтрыгуе. Пастаноўка надзвычай цікавая, майстэрства акцёраў – на самым высокім узроўні!” – зазначае студэнтка Ганна Нікіпорчык.
