На педагагічным факультэце прайшла віктарына “Гродна – культурная сталіца Беларусі”, арганізаваная куратарамі Ганнай Уладзіміраўнай Крофта і Аленай Канстанцінаўнай Гачко. Мерапрыемства зацікавіла многіх студэнтаў і педагогаў. Як кажуць арганізатары віктарыны, выбар такой тэмы абумоўлены не толькі статусам, нададзеным Гродна ў 2014 годзе, але і жаданнем прыцягнуць увагу да хараства горада і вобласці, іх багатай культурнай спадчыны.
Дзве студэнцкія каманды з сакавітымі назвамі “Дранікі” і “Лапсярдак” спаборнічалі ў ведах па гісторыі і сучаснасці Гродзеншчыны. Гледачы таксама паўдзельнічалі ў віктарыне і атрымалі сувеніры за правільныя адказы. Вечар вяла студэнтка 2 курса Кацярына Курчэня.
Спаборніцтва чаргавалася з канцэртнымі нумарамі: песні “Родны мой горад”, “Купалінка”, “Беларусь мая сінявокая” выканалі студэнткі Марына Гапонік, Надзея Сідлярэвіч, Карына Млыноўская.
Тонка і далікатна пачуццё кахання было ўвасоблена ў танцы Зінаіды Грачыхінай пад песню “Зорка Венера”.
Прызнанне ў любові да роднага краю прагучала ў вершы К. Буйло “Люблю”, які прачытала студэнтка 2 курса Вольга Герасімовіч. Гучалі і ўласныя вершы: “Каложа” старшага выкладчыка Г.У. Крофта і “Шчучын” студэнткі 1 курса Алены Разуевай.
Сцэнку пра вёску і горад паказалі Алена Дамуць і Наталля Канюк.
На развітанне Карына Млыноўская праспявала песню “Простыя словы”, каб яшчэ раз нагадаць прысутным, што сапраўднае шчасце – у простых рэчах: доме, сям’і, месцы, дзе нарадзіўся.
Гледачы віктарыны ўзбагаціліся новымі ведамі і станоўчымі эмоцыямі, і яшчэ на наступны дзень студэнты напявалі беларускія песні, пачутыя імі на мерапрыемстве.
