11 сакавіка 2017 года студэнты 4 курса спецыяльнасцей “Дашкольная адукацыя” і “Пачатковая адукацыя” наведалі музей Максіма Багдановіча.
Студэнты вывучалі ў працэсе тэатралізаванай экскурсіі “Марыя Апанасаўна запрашае” тэму “Сямейнае выхаванне і яго спецыфіка” па дысцыпліне “Педагогіка сямейнага выхавання”. Наведвальнікаў музея сустрэла маці знакамітага паэта Марыя Апанасаўна, якая расказала пра сябе і ўзаемаадносіны са сваім мужам Адамам Ягоравічам, пра сваіх дзяцей, асаблівасці іх выхавання, пра сямейныя каштоўнасці сям’і Багдановічаў. Гаспадыня дома Багдановічаў прапанавала гасцям пагуляць у фанты, частавала прысутных зёлкавай гарбатай, бо заўсёды любіла збіраць лекавыя травы і выкарыстоўвала іх для лячэння дзяцей.
Цікавая, запамінальная інфармацыя аб сямейным выхаванні ў доме Багдановічаў, пададзеная ад першай асобы, натуральная і разняволеная атмасфера, яркія ўражанні ад экспазіцыі, дапоўненыя музычным суправаджэннем (паланэзам Агінскага), мастацкім чытаннем апавядання Марыі Апанасаўны – гэта тое, чым вылучаліся дадзеныя заняткі.
